Transcription
1
Despeche à leurs magestés faict au Crest le Ve may 1573
2
Sire, jay receu votre despeche du XXIIIe davril et la lettre que votre magesté esccrit au gouverneur
3
d'Orenge, que je luy ay envoyée par ung trompete. Jen attendz la responce.
4
Au reste, sire, jemploye tout ce que jay de pouvoir et scavoir pour rompre les
5
desseings des rebelles qui nous menassent de quelque secours qui leur doibt
6
venir du cousté de Genève et Berne ; ce qui fust advenu si leurs entreprinses
7
eussent prins telle fin quilz se promectoyent. Aucuns de ceulx qui sont esté
8
executez par justice lont confessé allant au supplice. On ne laisse dy envoyer
9
gens pour en descouvrir quelque chose. Je vous envoye la copie dune lettre
10
que le sieur de St Romain ma escrit. Ce pays faict tous les effors quil peult
11
pour donner entretenement aux forces quon a esté contrainct mectre sus et
12
ont empruncté argent dans Lyon à grand interest ; et ma fallu, sire, imposer
13
sur le sel qui est le moyen le plus gracieulx, dautant que toutes sortes de gens
14
le payent, soit d'Esglise, nobles ou [écrit au-dessus de : et] comunes. Je pence bien, sire, que monsieur
15
de Savoye et les Valesiens sen pourroient douloir à votre magesté et jà les consellers
16
destat dudit sieur de Savoye men ont escrit, mais les commis des troys estatz
17
de ce pays feront de sorte quelle nen aura aucune plaincte ny doleance.
18
Sire, la nuict du XXVIe du passé, les rebelles donnarent une escallade à votre
19
ville de Dye. Mais une compagnie questoit dedans et ceulx de ladite ville, les
20
repoulsarent si vifvement quilz y furent bien frottez et en demeura sus le lieu
21
et y en eust plusieurs blessez et y laissarent quatorze eschelles. Le lendemain,
22
ayant envoyé en campagne monsieur de Rousset et de Geissan, mon lieutennant et
23
enseigne, avecque ma compagnie et les chevaulx ligiers du sieur Jullio Senturion
24
et quelzques arquebusiers. Ilz rancontrarent une compagnie de ceulx qui
25
sestoient trouvez à ladite escallade, qui fut si mal traictée que, environ soixante
26
demeurarent sur la place et bon nombre de blessez ; de sorte quilz ne
27
comparoissent guières en campagne quilz ne soient battuz. Il est vray quil y
28
a environ dix jours que pour la meschanceté daucuns qui avoient esté
29
[83 v°] autreffoys de leur party et menoyent des soldatz catholiques, ilz sen fuyrent
30
et lesdits catholiques furent deffaictz à huict lieues au dessus de Grenoble. Il en fut
31
tué une trenteyne et en tiennent quelzques prisonniers. Voyla, sire, comment les
32
affaires passent en ce gouvernement où ceulx du Vivarais viennent comme
33
et quand il leur plaist, à cause du passage du Rosne quilz ont libre.
34
Monsieur d'Ambrun assemble communes et autres forces quil peult pour
35
garder de passer quelzques gens qui sassemblent en la vallée d'Angrongne
36
et autres de mondit sieur de Savoye. Ceulx de Pragella ne remuent point
37
encores et font de belles promesses ausquelles ne se fault arrester,
38
car silz veoyent leur poinct, ilz ne fauldroit point de jouer leur personnage.
39
ledit sieur d'Ambrun a ranforcé les garnisons des chasteaulx et ville de Brianson
40
et Exilles et pourveu à Ambrun, Gap et autres lieulx de ces montagnes.
41
Je ne feroys pas mon debvoir si je vous celloys la peyne quil prent
42
et la despence quil y faict.
43
44
A Catherine de Médicis
45
Madame, pour lesperance que jay quil vous plaira veoir et considerer tous
46
les poinctz et articles contenuz en la lettre que jescriz au roy, je ny feray autre
47
redicte à votre magesté, si nest pour vous supplier très humblement, madame,
48
faire consideration au contenu dicelle et my vouloir ayder et souvent sellon
49
que vous congnoistrez votre service le requiert.